اصعب سوال

اصعب سؤال

أصعب سؤال اللي جوابه للأسف مثله سؤال
ماهو تفلسف إلاموقف صار وأسمع ثاني بيت
البارحه يومه سأل وشذكرك بذيك الليال؟
كان الجواب بكل بساطه: من متى اصلاً نسيت؟
ادري بأن جمع الصعوبه والبساطه شي محال
لكنها صارت كذا والاهم اني دريت
ان الحياه بعد احبابك إذا جف الوصال
تعيشها لوتقتنع انك خلاص اصبحت ميت
ياصاحبي لوكل شي يمر بالخاطر يقال
ماكانت العبره اتولجني ليامنك طريت
شفني قدرت احبس دموعي بس دمع القاف سال
وياكبرها ساكت ولكن داخل اوراقي بكيت
عمر الحكي ماكان دافي لبتدا بقولة تعال
لجل التجاهل رجفت حروفي ليامني حكيت
الحال في بعدك قسم بالله ماسميه حال
انوي على الضحكه واحس كلي خطا لأني نويت
تصور انك من رحلت اشوف كل جسمي ظلال
لاشفته امشي ببتعد واثره معي مهما مشيت
مدام يعني في بحرك لفرحتي مليون جال
وشفيه موجك ماركد قربت اموت ومارسيت
يرضيك ماعادة معي تفرق اذا جالك مجال
لاني اقتنعت انك نهايه واني ببطي مابديت
صرت اعق احجاجي إذا جابوك بطراف الجدال
وانا قبل لو قالوا اسمك كني ميت ثم حييت
تعبت اعيش بدور وافتح للمعاذير الخيال
واتخيل اني جيت في بالك وانك استحيت
وتردلي كلك وله وتقول كن البعد طال
ومن الفرح ماعاتبك واقول ياخي مابغيت
حتى وانا اتخيل حشمتك لأن قلبي لايزال
يكرر اسمك داخل اعماقي بنبضه لاسهيت
قلي شسوي فيك وانت بداخلي اصدق مثالل
للحب واحساس القصيد ان عانق الليل وسريت
ربي يصبرني على الفرقا مدام الحظ مال
وانت بيجيلك يوم تعرف ليه في بعدك شكيت
واذا بلاك الله وعذبك اشتياقك بس تعال
واقرى القصايد في غيابك كل ابوها بيت بيت
تدري ان اصعب سؤال اللي يجي رده سؤال
لي قلت لي وش ذكرك ثم قلت لك متى نسيت